छत्तीसगढ़ म साय सरकार के मंत्रिमंडल ल लेके लंबी कशमश के बाद अंततः अब ओकर एक खाका दिल्ली म तईयार हो गिस। मंत्रिमंडल म कोउन कोउन रइही येकर पूरा सूची लेके आज मुख्यमंत्री विष्णुदेव साय, उपमुख्यमंत्री अरुण साव, विजय शर्मा, क्षेत्रीय संगठन महामंत्री अजय जामवाल अउ प्रदेश के संगठन महामंत्री पवन साय बिहान दिल्ली ले लहुट के आइस।
दिल्ली म एक दिन पहली भाजपा के राष्ट्रीय अध्यक्ष जेपी नड्डा के ठउर म केंद्रीय गृह मंत्री अमित शाह के सँग प्रदेश प्रभारी ओम माथुर, नितिन नवीन, मुख्यमंत्री विष्णुदेव साय, उपमुख्यमंत्री अरुण साव, विजय शर्मा, क्षेत्रीय संगठन महामंत्री अजय जामवाल अउ प्रदेश के संगठन महामंत्री पवन साय के सँग गंभीर मंथन होइस। येकर बाद मंत्रिमंडल के नाम ऊपर आखिरी मुहर लगा दिस। छत्तीसगढ़ म साय सरकार के कैबिनेट के विस्तार ल लेके कल इहा ले मुख्यमंत्री विष्णुदेव साय, उपमुख्यमंत्री अरुण साव अउ विजय शर्मा मंझनिया दिल्ली बर उड़े रहीस। दिल्ली पहुंचे के बाद तीनों झन संझा के करीब पांच बजे प्रदेश प्रभारी ओम माथुर के ठउर म पहुँचीस। इहा सह प्रभारी नितिन नवीन घलो संघरे रहीस। पहिली श्री माथुर के ठउर म कैबिनेट के विस्तार ल लेके मंथन करे गिस।
नड्डा-शाह ह तय करिस नाम
श्री माथुर के ठउर म मंथन के बाद श्री माथुर अउ श्री नवीन के सँग मुख्यमंत्री अउ उपमुख्यमंत्री भाजपा के राष्ट्रीय अध्यक्ष जेपी नड्डा के ठउर म पहुँचीस। श्री नड्डा के ठउर म प्रदेश के नेता मन के श्री नड्डा अउ अमित शाह के सँग छत्तीसगढ़ के मंत्रिमंडल ल लेके लेकर गंभीर मंथन होइस। ये बईठक म क्षेत्रीय संगठन महामंत्री अजय जामवाल अउ प्रदेश के संगठन महामंत्री पवन साय घलो संघरे रहीस। ये बईठक म कोउन कोउन ल मंत्रिमंडल म संघेरे जाही, ऐला लेके लंबा गोठ बात होइस। कोउन ल मंत्रिमंडल म संघेरे जावत हे ये तो तय हो गे हावय, फेर नाम मन म अभी भाजपा डहर ले कोनो खुलासा नई करे हावय। एकरे सँग अभी ये बात के घलो कोनो जानकारी नई देवत हे कि मंत्रिमंडल के शपथ ग्रहण कब होही।
साय अउ जामवाल घलो पहुँचे रहीस दिल्ली
प्रदेश भाजपा के संगठन महामंत्री पवन साय अउ क्षेत्रीय संगठन महामंत्री अजय जामवाल घलो कल दिल्ली पहुंचे रहीस। एक दिन पहिली ही सनिच्चर के दुनो नेता तिरुपति म दर्शन बर गे रहीस। उहाँ ले वापस रइपुर नई आके दिल्ली गिस अउ उहाँ श्री नड्डा के ठउर म होइस बईठक म संघरिस।
