रायपुर. छत्तीसगढ़ म प्रदेश के विष्णुदेव साय सरकार के मंत्री मन के नाव अभी तक तय नई हो पाए हे। अईसे म अब ये तय होंगे हावय की कैबिनेट के विस्तार अउ मंत्रिमंडल के शपथ ग्रहण विधानसभा सत्र के बाद हो होही। दिल्ली ले आये के बाद मुख्यमंत्री विष्णुदेव साय ह कहीस की मंत्रिमंडल का गठन जल्दी होही, फेर ओहर कोनो दिनांक या तिथि नई बताइस, फेर अतका जरूर कहीस की मंत्रिमंडल म नवा अउ जुन्ना मुखोटा जरूर रइही।
साय सरकार के मंत्रिमंडल के गठन ल लेके दु तीन दिन पहिली दिल्ली म भाजपा के राष्ट्रीय अध्यक्ष जेपी नड्डा, केंद्रीय मंत्री अमित शाह के सँग मुख्यमंत्री विष्णुदेव साय, उपमुख्यमंत्रियों अरुण साव, विजय शर्मा, प्रदेश प्रभारी ओम माथुर, सहप्रभारी नितिन नवीन, क्षेत्रीय संगठन महामंत्री अजय जामवाल अउ प्रदेश संगठन महामंत्री पवन साय बईठक होइस। बईठक के बाद काली बिहनिया ले दिल्ली ले मुख्यमंत्री श्री साय आइस त ओहर मीडिया ले गोठ बात करत कहीस की , दिल्ली म श्री नड्डा अउ श्री शाह के सँग बईठक जल्दी ही मंत्रिमंडल का गठन करे जाही। एकरे सँग ओहर कहिस की मंत्रिमंडल म नवा अउ जुन्ना चेहरा रइही त ये बात घलो साफ होंगे कि महज नवा चेहरा ल एक मउका नई मिलय बल्कि कुछ पुराना चेहरा ल घलो मंत्री पद ले नवाजे जाही।
शपथ ग्रहण के हल्ला
कल संझा ले ही साय मंत्रिमंडल के मंगलवार के शपथ ग्रहण ल लेके हल्ला होवइ शुरुआत होंगे, इंडोर स्टेडियम म ऐला लेके तइयारी के गोठ घलो आगु म आये हे। इंडोर म तइयारी तो चलत हावय, फेर इहा शपथ ग्रहण कब होही ऐला लेके ककरो तीर कोनो जानकारी नई हे।
भाजपा के सूत्र मन के कहना हे कि टेंट वाले ल एक-दो दिन बाद तइयारी करे बर कहे रहीस, फेर ओहर पहिली ही तइयारी के शुरुआत कर दे हावय,येकर कारण ये खबर फइले हे शपथ ग्रहण कल होवइया हे,
साव जी बोलिस-जल्दी देबो जानकारी उपमुख्यमंत्री अरुण साव मीडिया के सवाल के जवाब म कहीस, दिल्ली म मंत्रिमंडल के गठन ल लेके बईठक होइस। मंत्रिमंडल के गठन जल्दी होही, ओहर मंगलवार के शपथ ग्रहण के सवाल म कहीस, जब भी शपथ ग्रहण के कार्यक्रम होही, जानकारी दे जाही।
सत्र के बाद ही शपथ
भाजपा के भरोसेमंद सूत्र ले जउन जानकारी मिलीस हे, येकर मुताबिक साय कैबिनेट के विस्तार २१ दिसंबर तक चलइया विधानसभा सत्र के बाद ही होही।अभी मंत्री मन के नाम फाइनल नई हो सके हे। कल घलो दिल्ली म श्री नड्डा अउ श्री शाह के बीच मंत्रिमंडलल लेके बईठक होये के गोठ तीर म आये हे। एक संभावना ये घलो जताये जावत हे कि सत्र के बाद दुसर दिन श्री साय एक बार फेर दिल्ली जा सकत हे। अईसे होये म मंत्रिमंडल के शपथ ग्रहण २३ दिसंबर या येकर बाद कभू भी हो सकत हे।
