भाजपा के परिवर्तन यात्रा म दर्जनों केंद्रीय मंत्री आइन, फेर छत्तीसगढ़ ल का मिलिस : धनंजय सिंह ठाकुर

रायपुर। भाजपा के परिवर्तन यात्रा म शामिल होय बर आय केंद्रीय मंत्री मन ऊपर कांग्रेस ह सवाल उठाय हे। प्रदेश कांग्रेस के वरिष्ठ प्रवक्ता धनंजय सिंह ठाकुर ह कहिस कि, भाजपा के परिवर्तन यात्रा म 14 दिन म प्रधानमंत्री ले लेके दर्जनों केंद्रीय मंत्री आइन अउ चले गइन। एकर मन के आय ले छत्तीसगढ़ के जनता ल का मिलिस। भाजपा के राजनैतिक यात्रा म सरकारी खर्चा अउ सुख सुविधा विलासिता उपभोग कर आये केंद्रीय मंत्री मन सिर्फ भाजपा के प्रचार-प्रसार करिन।

जब कोनो मंत्री के दौरा होथे तब जनता वो मंत्री ले कोनो नवा सौगात के उम्मीद करथे। ओकर विभाग ले संबंधित समस्या मन के हल चाहथे। जेन ए केंद्रीय मंत्री मन के दौरा म कहूं नइ दिखिस। भाजपा के परिवर्तन यात्रा म प्रधानमंत्री, केंद्रीय राज्य शिक्षा मंत्री, केंद्रीय गृह राज्य मंत्री, केंद्रीय रेलवे राज्य मंत्री, सहकारिता राज्य मंत्री, बिजली एवं उद्योग राज्य मंत्री, जल शक्ति एवं जनजाति राज्य मंत्री, सूचना प्रौद्योगिकी राज्य मंत्री, आयुष राज्य मंत्री, सहकारिता मंत्र आय रहिन। एकर मन के आय ले छत्तीसगढ़ ल का मिलिस। कोनो नवा घोषणा छत्तीसगढ़ के जनता के हित म एमन नइ करिन। भाजपा के सांसद मन घलो छत्तीसगढ़ बर एकर मन ले कोई मांग नइ करिन। धनंजय सिंह ठाकुर कहिस कि, रेलयात्री ट्रेन रद्द होय, समय म ट्रेन नइ मिले ले हताश अउ परेशान हे। अइसे म भाजपा के सांसद मन ल चाही कि रेलवे राज्य मंत्री ले व्यवस्था मन ल दुरुस्त करे के मांग करय। केंद्रीय शिक्षा राज्य मंत्री आय रहिस। ओकर ले भाजपा के सांसद मन ल राइट टू एजुकेशन के तहत निजी स्कूल मन ल मिलने वाला केंद्र के राशि जे अब तक रुके हुए हे ओला देय के मांग करना रहिस। जनजाति राज्य मंत्री ले जनजाति छात्रा मन ल मिलने वाला छात्रवृत्ति के। राशि लगभग 300 करोड़ रूपिया जेला केंद्र ह रोक के रखे हे। ओला देय के मांग करना रहिस। केंद्रीय स्वास्थ्य मंत्री मनसुख माड़िवया ले रायपुर एम्स म.चिकित्सक, मेडिकल स्टाफ़ अउ मेडिकल सुविधा ल बढ़ाय के मांग करना रहिस। एम्स रायपुर म.अभी चिकित्सक अउ स्टाफ के कमी हे। का भाजपा के सांसद मन के ए कोती धियान नइ गिस। प्रदेश कांग्रेस के वरिष्ठ प्रवक्ता धनंजय सिंह ठाकुर आघू कहिस कि, भाजपा परिवर्तन यात्रा म सिर्फ हवा बाजी करत हे। जनता ले समर्थन नइ मिलत हे। बाहिर ले नेता बलाके झूठ अउ प्रपंच के राजनीति करत हे। दुर्भाग्य के बात हे कि, केंद्र म सरकार होय के बाद घलो ओकर मंत्री छत्तीसगढ़ आथे। खाली हाथ आथे अउ खाली हाथ ही चले जाथे।