रायपुर। मुख्यमंत्री भूपेश बघेल ह शनिवार के रायपुर के पंडित जवाहर लाल नेहरू चिकित्सा महाविद्यालय म 700 बिस्तर क्षमता वाले नवा एकीकृत चिकित्सालय भवन के भूमिपूजन करिन। बता दन कि, चिकित्सा महाविद्यालय ले संबद्ध अस्पताल बर 322 करोड़ रुपिया के लागत ले आधुनिक सर्वसुविधायुक्त चिकित्सालय भवन के निर्माण जलदी ही सुरू होही। ए दौरान मुख्यमंत्री बघेल ह मेडिकल कॉलेज ऑडिटोरियम म महाविद्यालय के हीरक जयंती समारोह के शुभारंभ घलो करिन। ए अवसर म उप मुख्यमंत्री अउ स्वास्थ्य अउ चिकित्सा शिक्षा मंत्री टी.एस. सिंहदेव, संसदीय सचिव विकास उपाध्याय, छत्तीसगढ़ मेडिकल सर्विसेस कॉर्पोरेशन के अध्यक्ष डॉ. प्रीतम राम, छत्तीसगढ़ गृह निर्माण मंडल के अध्यक्ष कुलदीप जुनेजा, विधायक सत्यनारायण शर्मा, महापौर एजाज ढेबर, रायपुर नगर निगम के सभापति प्रमोद शर्मा अउ रायपुर जिला पंचायत के अध्यक्ष डोमेश्वरी वर्मा बिसेस रूप ले मौजूद रहिन। मुख्यमंत्री भूपेश बघेल ह भूमिपूजन कार्यक्रम अउ हीरक जंयती के शुभारंभ समारोह ल संबोधित करत कहिन कि, रायपुर मेडिकल कॉलेज अउ एकर ले संबद्ध चिकित्सालय ल आज के जरूरत के हिसाब ले विकसित करना हे।
ओमन सबो प्राध्यापक, स्टॉफ, छात्र-छात्रा अउ भूतपूर्व विद्यार्थी मन ल मेडिकल कॉलेज के 60 बछर पूरा करे बर बधाई अउ शुभकामना दिहिन। ओमन कहिन कि, अवइया बछर म ए मेडिकल कॉलेज अउ चिकित्सालय के प्रतिष्ठा बाढ़य। एकर बर हम सब ल मिलके काम करना हे। मुख्यमंत्री बघेल आघू कहिन कि, पाछू पांच बछर म राज्य म स्वास्थ्य सेवा म काफी बढ़ोतरी होय हे। स्वास्थ्य सुविधा के दायरा अउ गुणवत्ता दूनों बाढ़े हे। सरकारी अस्पताल म लोगन मन के भरोसा बाढ़े हे। दूरस्थ अंचल के लोगन तक घलो नि:शुल्क स्वास्थ्य सुविधा पहुंचे हे। शासकीय अस्पताल मन के माध्यम ले लोगन ल नि:शुल्क उपचार, जांच अउ दवई मिलत हे। मुख्यमंत्री कहिन कि, छत्तीसगढ़ के स्वास्थ्य मशीनरी हर संकट ले निपटे बर तैयार हे।
वैश्विक महामारी कोरोना के समय हमर डॉक्टर, नर्स अउ अन्य मेडिकल स्टॉफ मन बेहतर काम कर ए साबित घलो कर देहे। ओमन कहिन कि बस्तर अउ सरगुजा जैसे दूरस्थ क्षेत्र म मलेरिया अउ डायरिया फैलना अब बीते दिन के बात होगे हे। हमर मलेरिया मुक्त छत्तीसगढ़ अभियान ले मलेरिया के मामला म काफी कमी आये हे। ए दौरान उप मुख्यमंत्री टी.एस. सिंहदेव ह कार्यक्रम ल संबोधित करत कहिन कि रायपुर मेडिकल कॉलेज के 60 बछर के सफर शानदार रहे हे।
इंहा ले संबद्ध अस्पताल ले प्रदेशवासी मन ल बड़ा उम्मीद हे। एशिया के सबले एडवांस्ड मशीनरी घलो इहां उपलब्ध हे। नवा चिकित्सालय भवन के भूमिपूजन के बाद अब जलदी ही एकर लोकार्पण के घलो समय आही। ओमन मुख्यमंत्री के प्रति आभार व्यक्त करत कहिन कि अस्वस्थता के बावजूद ओमन कार्यक्रम म मौजूद हे। मुख्यमंत्री ले स्वास्थ्य विभाग बर जतका मांगें हन ओमन ओकर ले जादा ही देय हे।
चिकित्सा शिक्षा विभाग के अपर मुख्य सचिव रेणु जी. पिल्लै ह कहिन कि, रायपुर मेडिकल कॉलेज प्रदेश के सबले बड़का टर्शरी केयर हॉस्पिटल आय। इहां लगातार बाढ़त मरीज मन के संख्या ल देखत हुए सर्वसुविधायुक्त एकीकृत चिकित्सालय भवन के जरूरत लंबा समय ले महसूस करे जावत रहिस। अब भूमिपूजन होय के बाद जलदी ही एकर निर्माण घलो शुरू हो जाही। डॉ. तृप्ति नागरिया ह अपन स्वागत भाषण म रायपुर मेडिकल कॉलेज के 60 बछर के सफर के जानकारी दीन। ओमन बताइन कि 1963 म 60 विद्यार्थी के संग एकर यात्रा शुरू होय रहिस। अब इहां एमबीबीएस के 230 अउ पीजी के 150 सीट हावय। मेडिकल कॉलेज ले संबद्ध अस्पताल के क्षमता 700 बिस्तर ले बाढ़ के 1248 होगे हे। नवा एकीकृत चिकित्सालय भवन म 700 बिस्तर बाढ़े ले इहां बिस्तर के संख्या करीब दो हजार हो जाहि।
ए अवसर म हीरक जयंती आयोजन समिति के सह-अध्यक्ष डॉ. ललित शाह, सचिव डॉ. राकेश गुप्ता, कोषाध्यक्ष डॉ. अनिल जैन अउ डॉ. भीमराव अंबेडकर स्मृति चिकित्सालय के अधीक्षक डॉ. एस.बी.एस. नेताम सहित रायपुर मेडिकल कॉलेज के प्राध्यापक, आयोजन समिति के पदाधिकारी, सदस्य अउ छात्र-छात्रा मन बड़का संख्या म उपस्थित रहिन।
