केशव पाल, तिल्दा-नेवरा। कुछ दिन बाद गणेशोत्सव पर्व अवइया हे जेला लेके लोगन मन म सुगबुगाहट चालू होगे हे। ए बछर गणेशोत्सव पर्व ले लेके लोगन मन के उछाह पूरा सबाब म हे। गणेश मूर्ति के स्थापना बर जघा-जघा बड़का-बड़का पंडाल तैयार करे जात हे। मूर्तिकार मन ल घलो गणेश प्रतिमा मन ल अंतिम रूप देय बर जुटे हुए हे।
मूर्ति के आर्डर ए बार कुछ जादा हे। बुकिंग सुरू होगे हे। विभिन्न स्वरूप म मूर्ति मन आकार लेवत हे। ए बछर 19 सितंबर ले गणेशोत्सव पर्व के शुरूआत होवत हे। जेकर तैयारी घलो चालू होगे हवय। मूर्तिकार मन तीन-चार महिना पहिली ले ही गणेश मूर्ति बनाय के चालू कर देहे। ताकि स्थापना के दिन तक अपन काम ल पूरा कर सकय। ए समय पहिली ले ही कई मूर्ति के बुकिंग होगे हे। कुर्रा के मूर्तिकार जयप्रकाश धीवर ह बताइस कि, रंग-रोगन म खर्चा जादा आवत हे ए कारण मूर्ति मन के रेट घलो बाढ़ गेहे।
हर बछर मूर्तिकार मन पैसा उधारी म लेके पूरा परिवार सहित मिलके मूर्ति बनाय के काम चालू करथे अउ आवश्यक रहिथे त बाहर ले पेंटर घलो बलाके वोकर सहायता लेथे जेकर ले खर्चा तो बाढ़बे करथे संगे-संग मूर्ति मन ल सुरक्षित रखे बर बड़का जगह के व्यवस्था घलो करे ल पड़थे।
बता दन कि, गणेशोत्सव पर्व हर बछर समूचा अंचल म बड़ आस्था अउ उल्लास के संग मनाय जाथे इही कारण लोगन पारा, मोहल्ला, चौक-चौराहा के संगे-संग अपन-अपन घर म घलो मूर्ति बैठाथे।गणेश मूर्ति मन के स्थापना बर सार्वजनिक गणेशोत्सव समिति मन घलो तैयारी करत हे।
मूर्ति स्थापना बर पंडाल बनाय जावत हे। दू फीट ले लेके छह-सात फीट तक के मूर्ति ए बछर बनत हे। छोटे-छोटे लइका मन घलो अपन-अपन घर मूर्ति बैठाही ए हिसाब ले छोटे मूर्ति मन के मांग घलो अधिक हे। मूर्तिकार मन दिन-रात एक कर मूर्ति मन ल तैयार करत हे।
