–हमर छत्तीसगढ़ ले मानव तस्करी के खबर तो पहिली घलो आवत रिहिसे, फेर ए बखत नवजात लइका मनला घलो बेचे के खबर आए हे जी भैरा.
-हाँ सुने तो महूं ह रेहेंव के कम उमर के नोनी बाबू मनला बड़े महानगर मन म लेग के बेंच दे जाथे कहिके जी कोंदा.
-हव जी ए ह सही आय.. इहाँ के वनक्षेत्र मन ले अइसन बहुत जानकारी मिले हे, फेर अभी बस्तर के सुकमा के सरकारी अस्पताल ले खबर आए हे के उहाँ के पदमा नेताम नॉव के नर्स ह नवजात लइका मनला बहुत दिन ले बेचे के धंधा करत रिहिसे.
-वाह भई..!
-हव.. अभी उहाँ के कलेक्टर ह वोला एकरे सेती निलंबित कर के कानूनी कार्रवाई करे बर कहे हे. ए नर्स ह अइसन गरीब परिवार के नान्हे लइका मनला कम पइसा म बिसा के ओडिशा अउ आंध्र प्रदेश आदि म जादा पइसा म बेंच देवत रिहिसे, जेकर मन के तीन-चार लइका होगे राहय.
-बहुते अचरज के बात हे भई.. सरकारी अस्पताल ले अइसन अमानवीय धंधा चलत रिहिसे..!
