–नेता मन के जीव ह कहूँ सरकारी संसाधन म गुलछर्रा उड़ियाए ले थोक-बहुत बॉंचे अस जनाथे, त फोटो खिंचवा के पेपर मन म छपवाए के उदिम म अटके असन जनाथे जी भैरा.
-सिरतोन आय जी कोंदा.. ए मन ककरो मरनी-हरनी तक ल नइ देखय, बस फोटो खिंचवाए बर दल-बल संग पहुँच जाथें.
-हव जी संगी.. अभी देखना आगरा के शहीद कैप्टन शुभम गुप्ता घर जेन लजलजावन बानी के नजारा देखे ले मिलिस तेहिच ला.
-कइसन ढंग के जी?
- बताए म घलो थरथरासी अस जनाथे संगी.. राजौरी म शहादत पाए शुभम गुप्ता के घर आगरा म जब उंकर पार्थिव शरीर के अगोरा करत महतारी पुष्पा गुप्ता संग जम्मो जुरियाए लोगन रोवत-कलपत रिहिन, तभे उहाँ के उच्च शिक्षा मंत्री अउ विधायक ह पचास लाख रुपिया के चेक धर के फोटो खिंचवाए म मगन होगे रिहिन हें.
-भारी निरलज्जई कस गोठ आय संगी!
-हव जी.. शहीद के महतारी ह चेक ल तो नइ झोंकिस.. रोवत कहिस के इहाँ तुमन अपन प्रदर्शनी मत लगावौ.. हो सकय त मोर बेटा ल वापस लान देवौ.
