–हमर देश के संवैधानिक व्यवस्था म केंद्र अउ राज्य के बीच संबंध ल गुरतुर बनाए खातिर केंद्र द्वारा राज्यपाल के नियुक्ति करे जाथे जी भैरा, फेर आजकाल ए देखे म जादा आवत हे, के राज्यपाल मन प्रदेश सरकार के काम म अटघा डारे के कारज जादा करत हें.
-हव जी कोंदा महूं ल अइसने जनाथे, खासकर के वो राज्य मन म अइसन जादा होवत हे, जिहां केंद्र म बइठे सरकार के विपक्षी दल ह शासन म हे.
-हव जी.. हमर छत्तीसगढ़ म ही देख लेवौ.. विधानसभा द्वारा पारित कई ठन विधेयक ल राजभवन बछर भर ले जादा बेरा ले बरपेली अरझा के राखे हे. अइसने कतकों राज्य म होवत हे, जेकर सेती राज्य सरकार मन कोर्ट के संकरी हलावत रहिथें. अभी सुप्रीम कोर्ट ह तमिलनाडु अउ केरल के राज्यपाल मन ऊपर अइसने लेटलतीफी के सेती नाराजगी देखाय हे.
-देखाना ही चाही. केंद्रीय एजेंसी मन के चाल घलो अइसने जनाथे. देखना अभी झीरम घाटी नक्सली हमला वाले मामला म घलो सुप्रीम कोर्ट ह एनआईए ल झटका दे दिस, अब छत्तीसगढ़ पुलिस ह एकर जॉंच करही.
