–कहाँ चले जी भैरा.. आज तो खॉंटी श्रमिक सजन बरोबर दिखत हावस?
-जोहार जी कोंदा.. हव आज श्रम के देवता विश्वकर्मा जी के पूजा कार्यक्रम हे ना हमर कारखाना म.. उंहचे जावत हौं.
-अच्छा हाॅं.. आज विश्वकर्मा भगवान के जयंती आय ना?
-अरे नहीं बइहा.. विश्वकर्मा जी के जयंती तो माघ महीना के अंजोरी पाख म तेरस तिथि के आथे.
-त फेर आज पूजा काबर?
-आज के ए अंगरेजी तारीख ल सब कल-कारखाना म बुता करइया अउ आने श्रम साधक मन बर अपन-अपन कार्यस्थल म पूजा करे खातिर जोंगे गे हे. तभे तो ए पूजा दिवस ल अंगरेजी तारीख के हिसाब ले मनाए जाथे. जयंती के रूप म मनाए जातीस त हमर भारतीय काल गणना के मुताबिक माघ अंजोरी तेरस के मनाए जातीस.
