–हमन लइका रेहेन त रोज बिहनिया प्रभात फेरी निकाल के गाँव भर घूमन अउ देश भक्ति गीत संग भजन कीर्तन घलो करत राहन जी भैरा.
-हव जी कोंदा.. फेर अब के लइका मन तो बेरा उवे के बाद सूत के उठथें, तहाँ ले मोबाइल-सोबाइल म अॉंखी गड़िया के बइठ जाथें.
-सही आय जी.. एकरे सेती अभी के लइका मन पहिली असन चेम्मर बानी के नइ जनावंय.. देखबे ते एकदम फोसफोसहा बानी के हरू जनाथें.
-फेर कतकों जुन्ना बेरा के लोगन अभी ले प्रभात फेरी के टकर ल छोड़े नइएं. अभी 6 अक्टूबर के स्वामी आत्मानंद जी के जयंती के दिन अइसने एक सियान भक्तूराम वर्मा के स्वामी जी के जनमभूमि गाँव बरबंदा म सम्मान करे गिस.
-अच्छा..
-हव.. भक्तूराम वर्मा ह अभी 75 बछर के सियान होगे हे, अउ वोला बिना नागा के प्रभात फेरी करत 50 बछर ले आगर होगे हे.
