प्रदेस स्तरीय कलमकार सम्मेलन 01 अक्टूबर के, जुरयाही प्रदेसभर के कलमकार
रायपुर। कलमकार मन बर किसिम-किसिम के रचनात्मक प्रयोग करइया साहित्यिक संस्था नव कलमकार साहित्य मंच के डहर ले प्रदेस स्तरीय कलमकार सम्मेलन सह सम्मान समारोह के आयोजन 1 अक्टूबर इतवार के बिहनिया 10 बजे ले संझा 4 बजे तक रखे गेहे। ए कार्यक्रम रायपुर के सिविल लाइन स्थित वृंदावन हॉल म सम्पन्न होही। सम्मेलन के मुख्य वक्ता वरिष्ठ साहित्यकार अउ लेखक सुशील भोले अउ संरक्षक शालिकराम तिवारी होही।
कार्यक्रम के संयोजक तुकाराम साहू ‘तरुण’ ह बताइस कि, प्रदेस भर के कलमकार मन के सम्मेलन होही। जेमा बिसेस रूप ले रायपुर, रायगढ़, बलौदाबाजार, महासमुंद, गरियाबंद, देवभोग, धमतरी, कांकेर, दुर्ग, राजनांदगांव, बालोद, कवर्धा, बेमेतरा, मुंगेली, कोरबा, बिलासपुर समेत छत्तीसगढ़ प्रदेस के लगभग सबो जिले ले नवोदित रचनाकार मन के सहभागिता होही। बता दन कि, कोरोना काल म लॉकडाउन के बेरा सकारात्मकता के प्रसार अभियान म लाइव एकल काव्य पाठ करइया 51 कलमकार मन ल सम्मानित करे जाही। उक्त आयोजन म करीब 75 कलमकार सामिल होही।
