छत्तीसगढ़ के भाजपा नेता नवा-नवा केंद्रीय मंत्री मन ल बला के झूठ बोलवाय के करत हे काम : सुशील आनंद शुक्ला
रायपुर। प्रदेश कांग्रेस संचार विभाग के अध्यक्ष सुशील आनंद शुक्ला ह भाजपा के परिवर्तन यात्रा अउ चुनावी सभा बर छत्तीसगढ़ आए 6-6 केंद्रीय मंत्री के दौरा ऊपर तंज कसत कहिन कि, अपन विश्वसनीय खतम हो जाय के बाद अब छत्तीसगढ़ के भाजपा नेता नवा-नवा केंद्रीय मंत्री मन ल बला के ओकर मन ले लगातार झूठ बोलवाय के काम करत हे। मैनपुर म केंद्रीय मंत्री कृष्ण पाल गुर्जर ह बेरोजगारी अउ अपराध के गलत आंकड़ा प्रस्तुत कर छत्तीसगढ़ के जनता ल अपमानित करिस।
वादाखिलाफी भाजपा के राष्ट्रीय चरित्र आय। अपराध म नंबर वन भाजपा शासित राज्य आय छत्तीसगढ़ त 18वां क्रम म हे। भूपेश सरकार म अपराध लगातार नियंत्रित होय हे अउ सबले कम बेरोजगारी दर वाला राज्य तो छत्तीसगढ़ आय। केंद्रीय मंत्री ए भूल गेहे कि रमन सरकार के दौरान छत्तीसगढ़ म बेरोजगारी दर 22.2 प्रतिशत रहिस जेन भूपेश सरकार आय के बाद लगातार कम होय हे। विगत 1 बछर ले छत्तीसगढ़ देश भर म सबले कम बेरोजगारी दर वाला राज्य आय। आधा फ़ीसदी ले भी कम बेरोजगारी दर हे छत्तीसगढ के। लेकिन दलिय चाटुकारिता म देश के केंद्रीय मंत्री बेशर्मी ले झूठ बोल के छत्तीसगढ़ के जनता ल अपमानित करत हे। शुक्ला ह कहिन कि, भूपेश पर भरोसा के सरकार के समक्ष भारतीय जनता पार्टी के सबो पैंतरा नाकाम हो चुके हे। छत्तीसगढ़ म आरएसएस अउ भाजपा के धर्मांतरण अउ सांप्रदायिकता के एजेंडा फेल हो गेहे। कवर्धा, नारायणपुर अउ बिरनपुर म घलो भाजपा के षड्यंत्र उजागर होगे हे।
रमन राज के भाजपा के वादाखिलाफी, कुशासन अउ भ्रष्टाचार के कलई खुल चुके हे। भाजपा के शीर्ष नेतृत्व घलो अब ए मान चुके हे कि छत्तीसगढ़ के भाजपा नेता दागी अउ अविश्वसनीय हो चुके हे अउ जनता के विश्वास पूरा तरीका ले गंवा चुके हे। इही कारण हे कि केंद्रीय मंत्री अउ राष्ट्रीय पदाधिकारी के सहारे ही विधानसभा चुनाव म जाय के तैयारी करत हे। 12 सितंबर ले निकले तथाकथित परिवर्तन यात्रा ल पहिली दिन ले ही जनता अउ भाजपा के कार्यकर्त्ता मन ही पूरा तरीका ले नकार दिन। 2014 ले 2018 तक केंद्र अउ राज्य दूनों जगह बीजेपी के सरकार रहिस अउ छत्तीसगढ़ के जनता ऊपर सबले ज्यादा अत्याचार भी इही चार साल म होइस। आदिवासी मन ल जल, जंगल, जमीन के अधिकार ले वंचित करिन। गरीब मन ल आवास ले वंचित करिन। किसान मन ल बोनस के नाम म ठगिस। फर्जी मामला म हजारों आदिवासी मन ल जेल म बंद करिन। लाखों लोगन पलायन करे बर मजबूर होइन। हजारों स्कूल बंद करिस। भूपेश सरकार म तो छत्तीसगढ़ म समृद्धि आये हे। लगातार वादा पूरा करे जावत हे।
शिक्षा, स्वास्थ्य, रोजगार अउ आम जनता के समृद्धि बर तो भूपेश सरकार ह वादा ले ज्यादा काम करे हे। स्कूल, कॉलेज, अस्पताल खोले के संग ही सबो विभाग मन म नियमित पद मन म भर्ती करे गेहे।
