रायपुर । प्रदेश के खिलाड़ी मन बर चार बछर के सूखा सिराही। राज्य सरकार के डहर ले जल्दी ही खेल अलंकरण के आयोजन करे जाही। खिलाड़ी मन ल चार बछर के बाद सम्मान मिलही। खेल अउ युवा कल्याण मंत्री टंकराम वर्मा ह अवइया बेरा म खेल म अब्बड़ बदले के आरो दे हावय।
ओहर जनवरी के आखिरी हप्ता म या फरवरी म खेल के अलंकरण के आयोजन कराये के संभावना जताइस। खेली मंत्री टंकराम वर्मा ह बताइस की पुराना मुख्यमंत्री भूपेश बघेल ह जउन खेल अलंकरण समारोह ल रोक के रखे रहीस, हमर पोठ ढंग ले ओला जनवरी म ही कर लेवन। फेर कोनो कारणवश नई हो पाही त फरवरी म खच्चित करबो।। खेल अलंकरण समारोह बर बढ़िया ढंग ले बजट के हिसाब करे जाही। प्रदेश के प्रतिभाशाली खिलाड़ी मन ल अलंकरण पुरस्कार जरूर मिलही। बतावत हव की प्रदेश म चार बछर ले ज्यादा बख़त खेल अलंकरण नई हो पाए हे। खेल अलंकरण नई होये के कारण खिलाड़ी मन ल योजना मन के लाभ नई मिल पावत हे। ये समारोह खिलाड़ी मन के उत्कृष्ट प्रदर्शन बर आयोजित होथे। राज्य म खेल अलंकरण नई होये ले खिलाड़ी मन के मनोबल घलो कम होवत हे।
खिलाड़ी मन के कहना हे कि मेडल पाये के बाद घलो ओला सम्मान नई मिल पावत हे। अलंकरण ले मिलिस राशि ले जरूरत के समान खरीदे हे। कोरोना के बाद सबो परेशान हे। प्रोत्साहन नई मिले के कारण खिलाड़ी मन ह पखार म अउ खेल ले दुरिहा होये ल धर ले हावय। खेल विभाग ल ऐला गंभीरता ले आरो लेना चाही। खेल अलंकरण शुरू होये ले सरकारी विभाग मन म नौकरी मन के रद्दा फेर खुलही।
प्रदेश म खेल अलंकरण के आयोजन नई होये ले गुसीयाये खेल खेल इया कांग्रेस सरकार के कार्यकाल म कतको बार सड़क म उतर के प्रदर्शन कर डरे हावय। सँग ही लंबित खिलाड़ी मन के नाम के जल्दी ही घोषणा अउ खेल अंलकरण समारोह के दिनांक के घोषणा करे के मांग ल लेके खेल विभाग के खिलाफ मोर्चा खोल के संचालक ल ज्ञापन घलो सौंप डरे हे।
राज्य खेल अलंकरण म मिलइया राशि
शहीद राजीव पांडेय पुरस्कार- तीन लाख
शहीद कौशल यादव पुरस्कार- डेढ़ लाख
वीर हनुमान सिंह पुरस्कार- डेढ़ लाख
शहीद पंकज विक्रम पुरस्कार- २५ हजार
